Janubiy Koreya prezidenti Shimoliy Koreya bilan tinchlik muzokaralarini taklif qildi.

Prezident Li Chje Myon Shimoliy Koreyaga ikki mamlakat o‘rtasidagi urushni tugatish va Pxenyan yadroviy dasturini rivojlantirishni to‘xtatish choralarini muhokama qilish uchun to‘g‘ridan-to‘g‘ri muzokaralarni boshlashni taklif qildi.

Li bu taklifni 15-avgust kuni Koreyaning Yaponiya mustamlakachiligidan ozod qilinganining 81 yilligiga bag‘ishlangan marosimda bildirdi.

Prezident Seul va Pxenyanni o‘zaro tahdidlardan voz kechishga va mojaroda bevosita ishtirok etuvchi tomonlar sifatida muzokaralarni boshlashga chaqirdi. Uning so‘zlariga ko‘ra, muloqot Shimoliy Koreyaning yadroviy arsenalini yanada rivojlantirishni to‘xtatish yo‘llarini topishga yordam berishi mumkin.

Li Chje Myon "beqaror sulh tizimi"ni tinchlik rejimi bilan almashtirish niyatini bildirdi. Shuningdek, u harbiy keskinlikni kamaytiradigan, qarama-qarshilik darajasini nazorat qiladigan va potensial inqirozlarning oldini oladigan ko‘p qatlamli xavfsizlik tizimini yaratishni taklif qildi.

"Umid qilamanki, Janubiy va Shimoliy Koreya tinch-totuv yashash va o‘zaro rivojlanish uchun muzokaralar stoliga o‘tirishadi", dedi siyosatchi.

Biroq, ikki mamlakat o‘rtasidagi munosabatlar tarangligicha qolmoqda. Shimoliy Koreya yetakchisi Kim Chen In ilgari Janubiy Koreya bilan birlashish siyosatidan voz kechgan va uni eng dushman davlat deb atagan edi.

Pxenyan Lining muloqotni tiklash bo‘yicha takliflarini rad etdi, Seulning yadroviy suv osti kemalarini qurish rejalarini tanqid qildi va AQSh-Janubiy Koreya qo‘shma harbiy mashqlarini provokatsiya deb atadi.

Janubiy va Shimoliy Koreya rasman urush holatida qolmoqda. 1950-1953-yillardagi Koreya urushi sulh bilan yakunlandi, ammo ikki tomon o‘rtasida hech qachon tinchlik shartnomasi imzolanmagan.