Парижда бўлиб ўтган «Кўнгиллилар коалицияси» саммитида Франция ва Буюк Британия Украинада уруш тугаганидан кейин хавфсизликни таъминлаш учун қўшин юборишга тайёр эканини маълум қилди. Бу ҳақда президент Эммануэль Макрон, Буюк Британия бош вазири Кир Стармер ва Украина президенти Владимир Зеленский иштирокидаги уч томонлама декларацияда айтилган.

Саммитда тахминан 30 давлат вакиллари, шу жумладан НАТО бош котиби Марк Рютте, Европа комиссияси раҳбари Урсула фон дер Ляйен, шунингдек АҚШ президенти Дональд Трампнинг махсус вакиллари Стив Уиткофф ва Жаред Кушнерлар қатнашди.

Томонлар «Париж декларацияси»ни қабул қилди. Унда Украинага хавфсизлик кафолатларини бериш, келажакдаги ўт очишни тўхтатиш режими устидан АҚШ координациясида назорат ўрнатиш ва Украина Қуролли кучларини қўллаб-қувватлаш кўзда тутилган.

Декларацияга кўра, Украинага жойлаштириладиган кўп миллатли кучлар фақат уруш тўлиқ тугагандан кейин киритилади. Уларнинг вазифаси – армияни қайта тиклаш ва Россия томонидан янги тажовузнинг олдини олиш.

Кир Стармернинг сўзларига кўра, Британия ва Франция Украинада «ҳарбий хаблар» ташкил этиш ва қурол-яроғ учун муҳофазаланган инфратузилма яратишни режалаштирмоқда.

«Бу кучлар Украина осмони ва денгиз хавфсизлигини таъминлайди», — деди у.

Владимир Зеленский эса ўз чиқишида тинчлик режаси ҳақида тўхталиб, унинг 90 фоизи келишилганини, аммо асосий тўсиқ ҳудудлар масаласи бўлиб қолаётганини таъкидлади.

«Энг катта келишмовчилик – ҳудудлар масаласи», – деди Украина президенти.

Россия томони эса Украина ҳудудига чет эл қўшинлари киритилишига қатъий қарши эканини яна бир бор билдирди ва бундай қадамни ўз хавфсизлигига таҳдид деб баҳолади.

Саммит иштирокчилари мазкур келишувни тинчликка олиб борувчи муҳим қадам деб атади, бироқ ўт очишни тўхтатишга ҳали эришилмагани ҳам қайд этилди.