Финляндия ва Эстониянинг Болтиқ денгизи акваториясидаги ҳудудий сувларида НАТО машғулотлари бошланди.

Финляндия мудофаа вазирлиги матбуот хизмати хабар беришича, 2025 йил 24 ноябрдан 4 декабргача Финляндия жанубидаги Архипелаг денгизи (Болтиқ денгизининг бир қисми)да ва Фин кўрфази этагида Ҳарбий-денгиз кучлари бошчилигидаги «Freezing Winds 25» («Совуқ шамоллар-25») ҳарбий машғулотлари бўлиб ўтади. Қурол кучлар ва кемалар Эстониянинг ҳудудий сувларидан ҳам фойдаланади.

«Совуқ шамоллар» машғулотларида Финляндиянинг Шимолий Атлантика алянсидаги иттифоқчилари — Белгия, Дания, Германия, Латвия, Литва, Нидерландия, Полша, Франция, Эстония ва АҚШнинг 20 та ҳарбий кемаси ҳамда НАТОнинг миналарга қарши махсус гуруҳи (SNMCMG1) қатнашади, дейилади хабарда. Машғулотларга жами 5 минг нафар ҳарбий жалб этилган.

«Машғулотларда денгиз йўллари ва муҳим инфратузилмалар хавфсизлигини таъминлаш бўйича ҳам кўникмалар оширилади», — дейилади Финляндия МВ хабарида.