Франция Миллий ассамблеясининг вице-раиси Клеманс Гете мамлакатни НАТОдан чиқариш ташаббуси билан чиқди. У ижтимоий тармоқдаги X саҳифасида ушбу масала бўйича парламентнинг қуйи палатасида овозга қўйиш учун резолюция киритишини маълум қилди.

«Франциянинг НАТО фаолиятида иштирок этиши масаласи ҳеч қачон бу қадар кескин турмаган эди. Бу альянс АҚШ бошчилигидаги ҳарбий тузилма бўлиб, аввало унинг манфаатларига хизмат қилади. Мен Францияни Шимолий Атлантика альянсидан, авваламбор қўшма қўмондонликдан чиқишга чақирувчи резолюция лойиҳасини муҳокамага қўйяпман», – деб ёзди Гете.

Унинг сўзларига кўра, бундай ташаббусга уни Вашингтоннинг сўнгги геосиёсий қадамлари ундаган. Хусусан, у АҚШ ҳарбийлари томонидан Венесуэла президенти Николас Мадуронинг ўғирлаб кетилиши билан боғлиқ ҳодисани эслаб ўтган. Шунингдек, Гете АҚШнинг «Фаластиндаги геноцидга» ҳарбий ёрдам кўрсатаётгани ва президент Дональд Трампнинг «Гренландияни қуролли аннексия қилиш билан таҳдид қилаётгани»дан ҳам ташвиш билдирган.

Шу билан бирга, аввалроқ Франциядаги ўнг қанотдаги «Патриотлар» партияси раҳбари Флориан Филиппо президент Эммануэль Макроннинг Украинага қўшин юбориш ҳақидаги қарорини танқид қилган эди. У бу ташаббусни «соф ақлсизлик» деб атаб, Парижни Москва билан тўғридан-тўғри тўқнашувга олиб келиши мумкинлигини таъкидлаган.