Россиянинг "Проект" нашри президент Владимир Путин давлат хизматини оилавий бизнесга айлантирганини иддао қилиб чиқди.

Мақолада президент қариндошларининг бутун тармоғи Россия иқтисодиёти ва ҳукуматининг асосий соҳаларида, вазирликлардан тортиб йирик давлат компанияларигача ўзини намоён қилгани таъкидланган. 

"Проект" Путин ҳокимият тепасидаги йилларида камида 24 нафар қариндоши ва яқин шерикларига - қизларидан тортиб, тахмин қилинган хушторлари ва уларнинг оилаларигача - давлат идоралари билан боғлиқ нуфузли лавозимларни эгаллашга ёрдам берганини аниқлади. 

"Ишга қабул қилинганлар" орасида президентнинг қизлари Мария Воронцова ва Катерина Тихонованинг оилалари, амакиваччалари Евгений ва Игор Путин ҳамда амакиваччалари Любов Шеломова ва Любов Круглова бор. Тергов маълумотларига кўра, уларнинг барчаси давлат тузилмалари билан бевосита боғлиқ даромад ва лавозимлар олган. 

Бундан ташқари, оммавий ахборот воситалари томонидан илгари Владимир Путин билан боғланган тўрт аёлнинг қариндошлари - унинг собиқ рафиқаси Людмила Очеретная, гимнастикачи Алина Кабаева, ишбилармон аёл Светлана Кривоногих ва телебошловчи Алиса Харчева - давлат хизматида ва йирик давлат компанияларида иш топдилар. 

Энг нуфузли лавозимлар давлат раҳбарининг амакиваччаси Евгений Путиннинг оиласига насиб этди. Унинг қизи, президентнинг жияни Анна Цивилева ҳозирда мудофаа вазирининг ўринбосари, эри Сергей Цивилев эса Россия энергетика вазири. Аннанинг укаси Михаил Путин "Газпром"да юқори лавозимни эгаллаган. 

"Проект"нинг ҳисоб-китобларига кўра, Путин барча Россия ҳукмдорлари орасида оилавий қариндошчилик миқёси бўйича рекордчи бўлиб, бу Романовлар давридан бошланган. Таққослаш учун, узоқ вақтдан бери кадрлар танлашда "жиноий" ёндашувнинг рамзи ҳисобланган Борис Елцин асосий лавозимларга бештадан ортиқ қариндошини қўймаган.