Перу ҳукумати Мексика билан дипломатик муносабатларни узганини маълум қилди. Бу қарор Мексика Лимадаги элчихонасида Перунинг собиқ бош вазири Бетси Чавесга сиёсий бошпана бергандан сўнг қабул қилинди.

Перу Ташқи ишлар вазирлиги Мексиканинг бу қарорини «дўстона бўлмаган ҳаракат» деб атади ва у икки мамлакат ўртасидаги аллақачон кескин бўлган муносабатларни янада ёмонлаштирганини билдирди. Шу билан бирга, Мексика Перунинг ички ишларига аралашишда айбланди.

Бетси Чавес ҳозирда қўзғолон уюштириш иши бўйича тергов остида.

2022 йилда президент лавозимини эгаллаган Педро Кастильо парламентни тарқатиб юборишга ва мамлакатда фавқулодда ҳолат жорий этишга уринишида айбланган эди. Унинг уриниши амалга ошмаган ва натижада Кастильо лавозимидан четлатилиб, қамоққа олинган. Тергов маълумотларига кўра, эса Чавес Кастильо режаларига алоқадор бўлган.

Аммо у бу айбловларни рад этган. Прокуратура уни 25 йилгача озодликдан маҳрум этишни талаб қилмоқда.

Ўтган ойда Мексика президенти Клаудия Шейнбаум Педро Кастильони қўллаб-қувватлаб, уни қамоқдан озод этиш ва «одил суд жараёнини таъминлаш» зарурлигини айтган.

Кастильонинг турмуш ўртоғи ва болалари ҳозирда Мексикада яшамоқда.