Россия 2026 йил декабрида АҚШнинг Майами шаҳрида бўлиб ўтадиган G20 саммитига олий даражада иштирок этиш учун таклиф этилди. Бу ҳақда Россия ташқи ишлар вазири ўринбосари Александр Панкин маълум қилди.

Унинг сўзларига кўра, Москва таклифни қабул қилиш масаласини кейинроқ ҳал қилади.

 «Олий даражада иштирок этиш учун таклиф бор, аммо бу масалани санасига яқинроқ кўриб чиқамиз», – деди Панкин.

Аввалроқ Россиянинг G20 даги вакили Светлана Лукаш АҚШ саммитга Россия президенти Владимир Путин келиши эҳтимолига тайёргарлик кўраётганини ва барча давлат раҳбарлари иштирок этиши кутилганини билдирган эди.

Россия президенти матбуот котиби Дмитрий Песков эса Москва G20 доирасидаги ҳамкорликни давом эттиришдан манфаатдор эканини таъкидлаган.

Маълумот учун, Владимир Путин охирги бор G20 саммитида шахсан 2019 йил Японияда иштирок этган. Кейинги йилларда Россия делегациясига ташқи ишлар вазири Сергей Лавров (2022–2024) ва президент администрацияси раҳбари ўринбосари Максим Орешкин (2025) бошчилик қилган.

Эслатиб ўтамиз, 2023 йилда Гаагадаги Халқаро жиноят суди Путинни ҳибсга олиш ордерини чиқарган. У Украинадан болаларни ноқонуний депортация қилишда гумон қилинмоқда. Бу ҳолат унинг Рим статутига аъзо давлатларга сафарларини чеклайди.

Шу билан бирга, АҚШ мазкур судга аъзо эмас. 2025 йилда Путин АҚШга ташриф буюриб, Аляскада ўтган саммитда иштирок этган ва президент Дональд Трамп билан Украинадаги можарони муҳокама қилган.

G20 — бу халқаро иқтисодий ҳамкорлик форуми бўлиб, унга 19 давлат, шунингдек Европа Иттифоқи ва Африка Иттифоқи аъзо.

Россия Украинага бостириб кирганидан кейин ҳам ушбу форматдан чиқарилмаган.