Россия ташқи ишлар вазирлиги расмий вакили Мария Захарованинг Римда тарихий минора қулаши ортидан берган баёноти Италия жамоатчилигини дарғазаб қилди. Италия ташқи ишлар вазирлиги ҳолат юзасидан тушунтириш сўраш учун Россиянинг Римдаги элчиси Алексей Парамоновни суҳбатга чақирди.

Куни кеча Римда ўрта асрларга оид Конти минорасининг бир қисми қулаб тушган эди. Расмий Москва инсоний талафотга олиб келган ҳолатдан фойдаланиб Италияга даҳанаки ҳужум уюштирган.

“Италия ҳукумати ўз солиқ тўловчилари пулини мақсадсиз сарфлар экан, бутун Италия – иқтисодиётдан то минораларгача қулайди”, – деб ёзган Россия ТИВ расмий вакили М.Захарова Телеграмдаги расмий саҳифасида.

Рус дипломати баҳсли постида Италия сўнгги вақтларда Украинага 2,5 миллиард евро миқдорида кўмак кўрсатганини ҳам эслатган.

Фожиа сабаб ҳамдардлик билдириш ўрнига танқидий руҳда баёнот берилиши Римни норози қилган ва Россия элчиси “гилам”га чақирилган.

“Бу шармандали баёнот маданий мамлакатда асло қабул қилинмайди. Биз ҳам нафратга лойиқ ушбу баёнотни рад этамиз. Биз Украинани қўллаб-қувватлаймиз, аммо бу Россия халқи муаммоларга дуч келса, ҳамдардлик билдирмаслигимизни англатмайди. Улардан ҳам ана шундай ҳурмат талаб қиламиз”, – деган Италия ташқи ишлар вазири Антонио Таяни.

Захарова Италияга нисбатан аввал ҳам провокацион баёнотлар бергани маълум. Хусусан, у жорий йил февраль ойида Италия президенти Сержо Маттареллани “ёлғон тарихий муқояса”да айблаган эди. Гап шундаки, Италия президенти Россиянинг Украинага қарши тажовузкор урушини Иккинчи жаҳон уруши давридаги учинчи рейх лойиҳасига менгзаган эди. Ўшанда Италия бош вазири Жоржа Мелони Мария Захаровага кескин жавоб қайтариб, у бутун итальян халқини ҳақорат қилганини айтганди.

Март ойида Ҳиросимада чиқиш қилган Италия президенти Москва хатарли ядро ғоясини илгари сураётганини айтган, Захарова бунга жавобан Римни сохтакорликда айблаган эди. Пировардида Россия элчиси А.Парамоновга Италия томонидан расмий протест топширилган.

Июль ойида эса Италия президенти, ташқи ишлар ва мудофаа вазирлари Кремль томонидан “русофоблар рўйхати”га киритилди.

Россия Украинага бостириб кирган 2022 йил февраль ойидан буён расмий Москванинг жарчиси саналган М.Захаровага нисбатан Европа Иттифоқи томонидан санкция жорий этилган.

Мария Захарова сўнгги йилларда Ўзбекистонга нисбатан ҳам дипломатик маданиятдан йироқ баёнотлар берган. Жумладан, у 2024 йил 25 сентябрь куни Тошкент шаҳри Чилонзор тумани 188-мактабда кузатилган кичик бир ҳолат юзасидан Ўзбекистондан “расмий тушунтириш” сўраганди. Ўз навбатида, “Миллий тикланиш” партияси етакчиси Алишер Қодиров рус дипломатига жавобан Ўзбекистоннинг “ички ишлари ҳақида бош қотиргунча муаммоларга тўла ўз ишлари билан шуғулланиш”ни тавсия қилганди.

Захарова 2020 йил май ойида Ўзбекистонда давлат тилида иш юритиш тўғрисидаги қонун лойиҳаси юзасидан мунозарали баёноти билан ҳам жамоатчиликда кучли эътироз уйғотган эди.

2020 йил июнь ойида эса воиз хоним Руминия сиёсатдонларида мустақил фикр йўқлигини иддао қилиши ортидан яна бир дипломатик можарога сабаб бўлган.

Ўша йили Россия президенти Владимир Путин айнан Захарованинг кинояли пости сабаб Сербия раҳбари Александр Вучичдан узр сўрашга мажбур бўлганди.