АҚШ ва Украина Флорида штатининг Мар-а-Лаго қароргоҳида бўлиб ўтган музокаралар чоғида тинчлик режасининг асосий қисми бўйича келишувга эришган. АҚШ президенти Дональд Трамп ва Украина президенти Владимир Зеленскийнинг маълум қилишича, режанинг 90–95 фоизи келишилган, аммо Донбасс масаласи ҳозирча ҳал этилмаган.

«Биз тинчлик келишувининг барча жиҳатларини муҳокама қилдик. Тинчлик режасининг 20 бандининг 90 фоизи келишилди. АҚШ томонидан Украинага хавфсизлик кафолатлари 100 фоизга келишилган. АҚШ-Европа-Украина форматидаги кафолатлар деярли тайёр. Украинани тиклаш режаси ишлаб чиқилмоқда. Фаыат ҳудудлар масаласи жуда мураккаб ва очиқ қолмоқда. Эҳтимол, тинчлик режаси парламентда ёки референдум орқали тасдиқланиши керак», – деди Владимир Зеленский.

Матбуот анжумани якунида Дональд Трамп АҚШ ва Украина референдум ўтказиш учун ўт очишни тўхтатиш масаласини муҳокама қилмаганини билдирди. Унинг сўзларига кўра, вақтинчалик сулҳни осонликча бузиш мумкин.

«Жуда яхши учрашув бўлди. Биз кўп масалаларни муҳокама қилдик. Путин билан ҳам самарали телефон суҳбати бўлди. Европа етакчилари билан гаплашдик. Менимча, урушни тугатиш масаласида катта олға силжишга эришдик. Дейлик, 95 фоизга яқинлашдик. Яқин икки ҳафта ичида Зеленский билан яна алоқалар бўлади, улардан бири 29 декабрга режалаштирилган. Ҳозир келишувга эришиш керак, акс ҳолда янги ҳудудлар босиб олиниши мумкин», – деди Трамп.

Аввалроқ Россия президенти ёрдамчиси Юрий Ушаков Владимир Путин ва Дональд Трамп ўртасидаги телефон суҳбатидан сўнг, Россия ва АҚШ раҳбарлари фикрича, вақтинчалик ўт очишни тўхтатиш можарони чўзиб юбориши мумкинлигини айтган эди.

Шу билан бирга, Владимир Зеленский аввалроқ камида 60 кунлик сулҳ эълон қилиш ва шу даврда тинчлик режасини, жумладан Донбасс масаласини референдумга чиқариш таклифини билдирган. 

Дональд Трампнинг айтишича, Россия ва Украина ўртасидаги урушни бир неча ҳафта ичида якунлаш мумкин.

«Энг ёмон ҳолатда бу амалга ошмаслиги ҳам мумкин, чунки айрим масалаларда қийинчиликлар бор. Лекин менимча, бир неча ҳафта ичида биз барибир натижани кўрамиз. Қачон ҳал этилишини билмайман, аммо биз бунга эришамиз», – деди АҚШ президенти.

Флоридада бўлиб ўтган АҚШ ва Украина делегациялари ўртасидаги музокаралар тахминан икки соат давом этди. Шундан сўнг томонлар Европа етакчилари билан видеоконференция ўтказди. Италия ташқи ишлар вазири Антонио Таянининг айтишича, суҳбатда Италия бош вазири Жоржа Мелони ҳам иштирок этган.

Финляндия президенти Александр Стуббнинг сўзларига кўра, томонлар «урушни тўхтатиш бўйича аниқ чора-тадбирларни муҳокама қилган».