Украина президенти Владимир Зеленский Кипрга ташрифи чоғида тинчлик музокараларида муайян илгарилаш борлигини маълум қилди ва уруш 2026 йилнинг биринчи ярмида якунланиши мумкинлигини истисно этмади.

Унинг айтишича, Украина Европадаги ҳамкорлари, шунингдек АҚШ ва «кўнгиллилар коалицияси» аъзолари билан олиб борилаётган музокаралар янги босқичга чиққан. Зеленский уруш Кипрнинг Европа Иттифоқи Кенгашига олти ойлик раислиги даврида якунланиши мумкинлигини қайд этди.

Президент X (Twitter) ижтимоий тармоғидаги саҳифасида босим етарли даражага етганда тинчликка эришиш мумкинлигини таъкидлаб, бу борада Европа Иттифоқи муҳим ўрин тутаётганини билдирди.

Зеленскийнинг сўзларига кўра, Москвани урушни тўхтатишга кўндириш учун Россияга нисбатан санкциялар сақлаб қолиниши лозим. Унинг таъкидлашича, Россия йўқотаётган ҳар бир доллар агрессор сифатидаги харажат ҳисобланади.

Аввалроқ Парижда бўлиб ўтган саммитда ўт очишни тўхтатиш ҳолатида Украинага хавфсизлик кафолатлари берилиши айтилган эди. Хусусан, Франция, Буюк Британия ва бошқа айрим давлатлар Украинага ўз ҳарбий контингентларини юборишга тайёр эканини билдирган. Германия каби давлатлар эса Украинани ҳарбий жиҳатдан ташқи томондан қўллаб-қувватлашга тайёрлигини маълум қилган.