Украина президенти Қўшма Штатларнинг Венесуэлага ҳужуми ва Николас Мадуро ва рафиқаси Сили Флореснининг ҳибсга олиниши ҳақида муносабат билдириб, бу «диктаторлар билан тўғри муомала қилишнинг намунаси» эканини айтди.

«Мен нима ҳам дердим. Агар диктаторлар билан шундай муомала қилиш мумкин бўлса, демак АҚШ кейинги қадамини ҳам яхши билади», – деди Зеленский Киевда журналистлар билан брифингда.

Зеленский бу гапи билан ҳеч кимнинг номини тилга олмаган бўлса-да, Украина оммавий ахборот воситалари бу Путинга ишора эканини билдирмоқда.

Аввалроқ АҚШ президенти Доналд Трампнинг Флорида штатидаги матбуот анжуманида давлат котиби Марко Рубио Мадурога қарши амалиёт бошқа давлатлар учун ҳам огоҳлантириш эканини, америкаликларнинг фикрларини жиддий қабул қилиш лозимлигини билдирганди.

Аввалроқ Украина ТИВ раҳбари Андрей Сибига мамлакат сайловни сохталаштиргани ва намойишчиларга куч ишлатгани учун Николас Мадуро режими тан олинмаслигини билдирган эди. «Биз келгуси алоқаларимизни инсон ҳуқуқлари, демократия ва венесуэлаликлар қизиқишини инобатга олиб, халқаро ҳуқуқ асосида олиб борамиз», – деб ёзган эди у.