Emirates Airlines ўз веб-сайтида Эрон фуқароларига БААга кириш тақиқлангани ҳақида эълон қилди. Чеклов виза ва паспорт талабларида акс этган.

Қарорнинг сабаблари ошкор қилинмаган ва БАА расмийлари томонидан расмий изоҳ йўқ. 

FlyDubai эса истисно эълон қилди: БААнинг «олтин визаси»га эга эронликлар мамлакатга киришлари ва транзит ўтишлари мумкин. Ушбу ҳужжат инвестиция орқали узоқ муддатли яшаш ҳуқуқини беради. 

АҚШ ва Исроилнинг Эронга қарши ҳарбий операцияси бошланганидан сўнг, Теҳрон Яқин Шарқдаги Америка базаларига ҳужумлар уюштирди. Мухолифатдаги Iran International газетаси эронлик муҳожирларнинг БААда яшаш рухсатномалари бекор қилина бошлаганини хабар қилди. 

Нашрга кўра, эскалация бошланганидан бери БААга қарата юзлаб баллистик ракеталар ва қарийб 2000 та дрон учирилган, ўлим ва жароҳатлар қайд этилган. Мамлакатда Эрон билан боғлиқ ташкилотлар ёпилмоқда ва депортациялар қайд этилмоқда.

Аввал айрим араб давлатлари АҚШдан Эронга ҳужумни тўхтатмасликни сўрагани хабар берилганди.