АҚШ солиқ бошқармаси афсонавий боксчи Флойд Мэйвезер (Кичик)ни огоҳлантирди — агар солиқдан қарзларини узмаса фуқаролик паспорти бекор қилиниши мумкин. Бу ҳақда The Ring нашри хабар тарқатди.

Манбага кўра, спортчининг зафарли фаолияти ортида улкан муаммо — 7,25 миллион доллардан ортиқ солиқ қарздорлиги мавжуд.

Ўзининг беқиёс жанглари билан машҳур Флойд Мэйвезер сўнгги пайтларда молиявий можаролар гирдобида қолди. Бокс ва реклама шартномаларидан келган беҳисоб даромадларига қарамай, собиқ чемпион ҳаракатланиш эркинлигини чеклаши мумкин бўлган тўсиққа дуч келди. Давлат солиқ идораси агар Мэйвезер мажбуриятларини бажармаса ёки тўловни бўлиб тўлаш борасида келишувга эришмаса, унинг хорижга чиқиш ҳужжати амалдан тўхтатилишини таъкидлади.

2017 йилда катта спортни тарк этган боксчи ўз вақтида: «Пул топиш бошқа, уни оқилона сарфлаш мутлақо бошқа нарса», деган эди.

Паспорти бекор қилинишининг олдини олиш учун спортчида бир нечта йўл бор. У қарзини тўлиқ ёпиши ёки тўлов муддатини узайтириш бўйича келишиб олиши зарур. Шунингдек, банкротлик тўғрисида ариза топшириш ҳам имкониятлардан бири сифатида кўрилмоқда.