Америкалик тадбиркор Илон Маск Буюк Британияни очиқдан-очиқ «қамоқхона ороли» деб атади. У бу фикрни X (собиқ Twitter) ижтимоий тармоғидаги постида билдириб, мамлакатда сўз эркинлиги амалда кескин чекланаётганини танқид қилди.

Статистик маълумотларга кўра, 2023 йил давомида Буюк Британияда 12 мингдан ортиқ инсон ижтимоий тармоқларда қолдирган изоҳлари ёки постлари учун ҳибсга олинган. Бу кўрсаткич дунёда мутлақ рекорд ҳисобланади.

Таққослаш учун:

— Буюк Британия: 12 000+ киши;

— Россия: тахминан 400 киши.

Илон Маск ушбу рақамларга салбий муносабат билдириб, Британияни сўз эркинлигига қарши курашаётган, назоратчи ва репрессив давлат сифатида тавсифлади.

Унинг фикрича, интернетдаги фикр ва изоҳлар учун оммавий равишда одамларни қамаш — демократик жамият учун хавфли тенденциядир.

Мутахассисларнинг қайд этишича, Британияда сўнгги йилларда “онлайн нафрат”, “тажовузкор нутқ” ва “таҳдидли изоҳлар”га қарши қонунлар кескин кучайтирилган. Аммо амалда бу қонунлар кўп ҳолларда оддий фуқароларнинг танқидий фикрлари ва баҳс-мунозаралари учун ҳам қўлланмоқда.

Натижада, Буюк Британия расман демократия ҳисобланса-да, ижтимоий тармоқда сўзлагани учун қамаладиганлар сони бўйича дунёда биринчи ўринга чиқди — ва айнан шу ҳолат Илон Маск томонидан кескин танқид остига олинди.