Испаниянинг Барселона шаҳрида АҚШ президенти Доналд Трампнинг MAGA сиёсатига мухолиф бўлган президент ва бош вазирлар йиғилишди. «Жаҳон тараққийпарвар кучларини сафарбар этиш» деб аталган халқаро машваратга АҚШнинг агрессив сиёсатини очиқ танқид қилиб келаётган сиёсатчи — Испания бош вазири Педро Санчес мезбонлик қилди.

Испания бош вазири Трампнинг номини тилга олмаган ҳолда унинг нафрат, уруш ва парокандаликка олиб келаётган сиёсатини кескин қоралади.

«Улар ҳар қанча баланд овозда бақирмасин, ҳар қанча ёлғон тарқатмасин, мутаассиб ўнглар даври хотима топмоқда», — деди Педро Санчес.

Бразилия президенти Луис Инасиу Лула да Силва ҳам бу баёнотни қўллаб-қувватлаб, «ўзини ватанпарвар атаган ҳолда суверенитетни сотувга қўяётганлар»ни танқид қилди.

Бразилия раҳбари ҳам АҚШ етакчисига очиқ-ошкора қарши чиқаётган сиёсатчилардан биридир. Жумладан, у Испаниянинг El País газетасига 16 апрел куни берган интервюсида Оқ уй раҳбари эрталаб қандай кайфиятда уйғонишидан қатъи назар, бошқа давлатларга таҳдид қилишга ҳақли эмаслигини таъкидлаган эди. Ўз навбатида, Трамп ўз дўсти, собиқ президент Жаир Болсонарунинг ҳибсга олингани сабабли Бразилияга катта миқдорда бож солиш билан пўписа қилган.

Барселонадаги тадбирда ЖАР президенти Сирил Рамафоса, Колумбия президенти Густаво Петро ва Мексика президенти Клаудия Шейнбаум ҳам қатнашди. Ҳар учала давлат раҳбари Трамп билан тарифлар ва миграция масаласида ихтилофга боргани маълум. Оқ уй маъмурияти ЖАРни оқтанлилар ҳуқуқларини бузишда ҳам айблаб келмоқда.

Тадбирда Германия вице-канцлери Ларс Клингбайл ва Буюк Британия ташқи ишлар вазири Дэвид Ламми ҳам иштирок этди. Машваратда қатнашиши кўзда тутилган Европа кенгаши раиси Антониу Кошта сўнгги лаҳзаларда ташрифини бекор қилди. Эҳтимол, сиёсий тадбир Трампга қарши руҳда экани боис Антониу Кошта эҳтиёткорлик важидан унда қатнашмасликни маъқул кўрган.

Испания бош вазири халқаро анжумандаги чиқишида тараққийпарвар кучларни ягона байроқ остида бирлаштириш муҳимлигини таъкидлаган.

Сиёсий етакчиларнинг бирортаси Доналд Трамп номини тилга олмаган бўлса-да, муҳокамалар жараёнида айнан Трамп олиб бораётган уруш ва тариф сиёсати кескин танқид қилинди.

Барселонадаги анжуманда Миннесота штати губернатори Тим Уолз ҳам қатнашди. 2024 йилги сайловда Камала Ҳаррис билан биргаликда Трампга қарши курашган Тим Уолз Оқ уй раҳбарининг сиёсатини «фашизм» деб атаган.

Таҳлилчиларга кўра, Испания бош вазири Педро Санчес Трамп каби ўта ўнг қанотга мансуб сиёсатчиларга қарши сўл қанот сиёсатчилари иттифоқини шакллантиришга уринмоқда.

Мадрид Вашингтоннинг агрессив сиёсатига очиқ қарши чиқмоқда. Хабарингиз бор, жорий йил 28 феврал куни АҚШ ҳамда Исроил Эронга қарши кенг кўламли уруш бошлади. Испания ўз ҳудудидан Эронга зарба бериш учун фойдаланишга рухсат бермади. Бундан дарғазаб бўлган Трамп Испанияга таҳдид қилиб, савдо алоқаларини тўлиқ узишини айтди. 

Трампнинг пўписаларига қарамай, бош вазир Педро Санчес АҚШ ва Исроилнинг Эронга қарши урушини қатъий равишда танқид қилиб келмоқда. Сиёсатчи урушни инсоният учун катта фалокат деб атаган ва Вашингтонни 2003 йилда Ироққа бостириб киргани каби ўтмиш хатосини такрорламасликка ундамоқда.

Испания ташқи ишлар вазири Хосе Мануэл Албаресга кўра эса, испан базалари «АҚШ билан тузилган келишув ва БМТ Низомидан ташқари мақсадларда» ишлатилмайди.

Испания АҚШнинг энг яқин иттифоқчиси ва Яқин Шарқдаги урушда шериги — Исроилнинг халқаро ҳуқуққа зид ҳаракатларини ҳам қоралаб келмоқда.