Россия Федерацияси Хавфсизлик кенгаши раиси ўринбосари Дмитрий Медведев Венесуэла президенти Николас Мадуронинг АҚШ томонидан ўғирланиши ва ҳибсга олинишини «сурбетлик», «қабиҳлик» ва «халқаро муносабатлардаги фалокат» деб атади.

Россиянинг собиқ президенти венесуэлалик ҳамкасбининг тақдири қандай кечишини ҳам башорат қилган.

«Бугун икки сценарий мавжуд, холос: ё АҚШ Венесуэланинг ўғирлаб кетилган президентини хайрли баҳоналар билан ими-жимида озод қилади (бунинг эҳтимоли кам), ё Мадуро Лотин Америкасининг янги Манделасига (ЖАРнинг атоқли давлат арбоби, 27 йил қамоқда ўтирган Нелсон Мандела назарда тутилмоқда — таҳр.) айланади (бунинг эҳтимоли катта). У ҳолда унинг номи (Симон) Боливар, (Франсиско) Миранда ва (Уго) Чавес (венесуэлалик инқилобчи арбоблар — таҳр.) билан бир қаторда Жанубий Америка тарихи зарварақларига битилади. Трамп ўжарлик қилиб Мадурони афв этмаган тақдирда ҳам, жамоатчилик босими остида Вэнс ёки унинг вориси шундай йўл тутса ажаб эмас», — деб ёзди Дмитрий Медведев Телеграмдаги расмий саҳифасида.

Рус сиёсатчисининг фикрича, Венесуэла раҳбарини ўғирлашдан кўзланган мақсад нефт омили, аммо унга эгалик қилиш АҚШга осон бўлмайди.

«Хўш, Венесуэланинг ҳозирги ҳукумати нефтни америкаликлар билан бўлишишни истамаса-чи? Нима, Трамп чиндан ҳам қуруқликда амалиёт бошлайдими? Конгресс рухсатисиз иш чиқмайди ва бу галги амалиёт Мадуронинг сурбетларча ўғирлашдан кўра қонлироқ кечади. Сенат эса куни кеча Трампнинг милитаристик иштаҳасини жиловлаш учун унинг бўйнига сиртмоқ ташлади», — деди Медведев.

Аввал хабар берганимиздек, 3 январга ўтар кечаси АҚШ Венесуэла пойтахти Каракас ҳамда мамлакатнинг бошқа ҳудудларига ҳарбий ҳужум уюштирди.

Ҳарбий амалиёт давомида Венесуэла президенти Николас Мадуро ва унинг рафиқаси Силия Флорес Каракасдаги саройидан ўғирлаб АҚШга келтирилди. Қўшма Штатлар расмий идоралари Мадурога нисбатан наркотерроризм, гиёҳвандлик моддалари контрабандаси, ноқонуний қурол-яроғ савдоси каби моддалар бўйича айблов эълон қилган.

5 январ куни Ню-Йорк федерал судида бўлиб ўтган илк маҳкама мажлисида Николас Мадуро ўзининг айбсиз эканини айтган. Судя Мадуро ва Флоресни ҳибсда сақлашни буюрган ва кейинги суд мажлисини 17 мартга белгилаган.

The Washington Post газетаси ёзишича, Россия Николас Мадурога сиёсий бошпана бериш ниятида ҳам бўлган.

Бу борада АҚШ расмийлари билан музокаралар 2025 йил декабр ойида Ватикан давлат котиби Петро Паролин томонидан олиб борилган. Аммо Вашингтон Ватиканнинг махфий сўровини рад этгани айтилмоқда.

Дмитрий Медведев ўз баёнотида АҚШ томонидан Россия байроғи остидаги кема ҳибс этилганини ҳам қоралаган ва бу ҳаракатга жавобан халқаро денгиз ҳуқуқи меъёрларини бузиш лозимлигига ишора қилган.

Маълумот ўрнида: АҚШ 7 январ куни Шимолий Атлантикада Marinera танкери ҳибс этилганини эълон қилди. Президент Доналд Трамп санкциясига дучор бўлган танкер Венесуэла нефтини ноқонуний равишда ташишга урингани айтилмоқда.

Рус сиёсатчилари Россия байроғи остида ҳаракатланаётган танкернинг қўлга олинишига жавобан АҚШнинг тавбасига таянтиришни талаб қилмоқда.