Яна 107 кундан сўнг Мексикада футбол бўйича жаҳон чемпионатининг очилиш ўйини бўлиб ўтиши керак. Пойтахт Мехикода мезбонлар Жанубий Африкага қарши майдонга тушиши режалаштирилган. Пойтахтдан ташқари, ўйинлар Монтеррей ва Гвадалахара шаҳарларида ҳам ўтказилиши кўзда тутилган. Бироқ мамлакатни қамраб олган зўравонлик тўлқини сабабли бу баҳслар ўтказилмай қолиши мумкин.

Гвадалахарада тўртта учрашув режалаштирилган, жумладан 26 июнь куни Уругвай — Испания марказий ўйини ва 18 июнь куни Мексика — Жанубий Корея баҳси. Шунингдек, Ўзбекистон – Колумбия учрашуви ҳам Мексикада ўтиши белгиланган. Аммо ҳозирда айрим ҳудудларда юз бераётган воқеалар фуқаролик уруши манзарасини эслатмоқда.

Гвадалахара аэропортида одамлар жонини сақлаш учун қочмоқда: оналар болаларини бағрига босган, оталар эса чемоданларини судраб кетмоқда. Улгурмаганлар рўйхатга олиш пештахталари ортига яширинишга мажбур. Видеоларда АҚШ ва Канада сайёҳлари орасида машҳур бўлган соҳилбўйи Пуэрто-Вальярта шаҳри устида тутун булутлари кўринмоқда.

Рейслар бекор қилиняпти, дўконлар ёпилган, мактаблар ишламаяпти. АҚШ Давлат департаменти огоҳлантирмоқда: «Бошпана топинг ва биноларни тарк этманг». Германия Ташқи ишлар вазирлиги ҳам хавфсизлик бўйича огоҳлантириш эълон қилиб, мамлакатнинг кўплаб штатларига сафардан тийилишни тавсия қилди.

Зўравонлик авж олишига “Эль Менчо” номи билан танилган ва “Халиско янги авлод” (CJNG) номли машҳур наркокартель раҳбарининг ўлими сабаб бўлди. У Мексика армияси ўтказган рейд чоғида ҳалок бўлган.

Кейин эса унинг ўлими учун қасос олиш бошланиб кетган. Бир нечта штатларда автобус ва юк машиналари ёқилмоқда, йўллар ёнаётган баррикадалар билан тўсилган, банк ва дорихоналар ўт ичида қолган. Ҳуқуқ-тартибот идораларининг 27 нафар ходими, жумладан Миллий гвардиянинг 25 ходими, бир қўриқчи ва бир штат прокуратураси ходими ҳалок бўлди.

Хавфсизлик билан боғлиқ вазият бутун дунё эътиборини тортар экан, яна бир савол тобора долзарблашмоқда: бундай шароитда бир неча ойдан сўнг жаҳон чемпионатини ўтказиш мумкинми? Расман тайёргарлик ишлари давом этмоқда, аммо ҳозирги воқеалар, айниқса, ўйинлар режалаштирилган ҳудудларда вазият беқарор эканини кўрсатмоқда.