Россия президенти Владимир Путин 21 ноябрь куни бўлиб ўтган Россия Хавфсизлик кенгаши мажлисида АҚШ президенти Дональд Трамп маъмурияти таклиф этган Украина бўйича «28 банддан иборат» тинчлик режаси ҳақида баёнот берди. Унга кўра, ушбу ҳужжат Россия–Украина ўртасидаги можарони ҳал қилиш учун асос сифатида қаралиши мумкин, бироқ Америка томони ҳужжатни Москва билан муҳокама қилмаган.

Президентнинг сўзларига кўра, Россияда мазкур тинчлик режасининг матни мавжуд ва Кремль уни Америка маъмурияти билан мавжуд каналлар орқали қўлга киритган.

«АҚШ режаси Украина томонидан рад этилгани учун уни биз билан муҳокама қилишмади. Менимча, Вашингтон Украина розилигини ололмаётгани сабабли Россия билан бу борада мулоқотга шошилмаяпти», – деди Путин.

Путиннинг айтишича, Украина ва Европадаги баъзи сиёсий доиралар ҳали ҳам «Россияни майдонда мағлуб этиш мумкин» деган фикрлар таъсирида қолган.

«Менимча, бу позициянинг асосида етарлича профессионал билим ва тушунча йўқлигидан кўра кўпроқ – реал вазият ҳақидаги объектив ахборотнинг йўқлиги ётади», – деди Россия президенти.

Путинга кўра, АҚШнинг илк таклифи Украина томонидан қабул қилинмагани учун Трамп маъмурияти ҳужжатнинг «янги, модернизация қилинган» – 28 банддан иборат версиясини таклиф қилган.

«Бу ҳам тинчликка эришишнинг асосий платформаси бўлиши мумкин. Лекин ҳозирча бизнинг иштирокимизда муҳокама қилингани йўқ», – деди у.

Путин ўз чиқишида Россия тинчликка тайёрлигини яна бир бор қайд этди, бироқ тинчлик шартлари Россия манфаатларига ва хавфсизлик тамойилларига мос бўлиши кераклигини таъкидлади.

У, шунингдек Украина маъмуриятини ҳамкорликдан бош тортяпти, деб танқид қилди.

«Украина ҳамон ҳаёлий орзуда: Россияни майдонда мағлуб этиш мумкин деб ўйламоқда. Бу – реал вазиятдан узоқ», – деди у.

Эслатиб ўтамиз, 2025 йил ноябр ойида Трамп маъмурияти Украина–Россия можаросини тўхтатиш учун 28 банддан иборат янги тинчлик дастурини ишлаб чиқди. АҚШ томони Зеленскийдан ушбу ҳужжатга жавобни 27 ноябрга қадар кутаётганини маълум қилди. Киев ҳозирча бу таклифни қабул қилишга шошилмаяпти, чунки унда Россияга бир қатор геосиёсий имтиёзлар берилгани танқид қилинмоқда.