Украина ва АҚШ делегациялари Женевада Вашингтон томонидан ташаббус қилинган янги тинчлик режасининг аксарият бандлари бўйича келишувга эришдилар. Бу ҳақда «РБК-Украина» ўз манбаларига таяниб хабар берди.

Манбаларга кўра, Женевада ўтган музокараларда АҚШ режасининг асосий қисми мувофиқлаштирилган. Мунозарали деб топилган қатор бандлар эса қисман қайта ишланган. Қийин бўлган масалалар қаторига Украина Қуролли Кучлари сони, Запорожье АЭС устидан назорат, асирлар ва қўлга олинганлар алмашинуви формати киради.

«РБК-Украина» манбаларига кўра, энг асосий бандлар – аннексия қилинган ҳудудлар бўйича келишув ва Украина Конституциясига НАТОга аъзо бўлмаслик тўғрисида норма киритиш масалалари – делегациялар ўртасида муҳокама қилинмаган. Бу икки масала алоҳида ҳолда давлат раҳбарлари — Владимир Зеленский ва Дональд Трамп томонидан кўриб чиқилиши керак.

Манбалардан бирининг айтишича, АҚШ делегацияси бошланғич музокаралар давомида Киевга қаттиқ оҳангда мурожаат қилган. Улар Украинада тинчлик режаси 27 ноябргача маъқулланмаса, «қурол етказиб бериш ҳам, разведка маълумотлари ҳам» тўхтатилиши ҳақида ультиматум қўйган.

Қайд этилишича, агар Киев ва Вашингтон яқин кунларда тўлиқ келишувга эришса, АҚШ режанинг Европа давлатларига тааллуқли қисмларини улар билан ҳам келишади ва «Россияни ишонтириш учун қўрқитиш ва рағбатлантириш усуллари бирлашган тактикани қўллайди».