Jahonning yirik texnologiya forumi hisoblangan Digital Bridge 2025 bu yil yana bir muhim voqeaga guvoh bo‘ldi. Telegram asoschisi Pavel Durov forum minbaridan turib Qozog‘istonda yangi Alem AI laboratoriyasi ochilishini e’lon qildi.

Ushbu markaz Qozog‘istondagi zamonaviy superkompyuter klasteri asosida tashkil etilgan bo‘lib, u Telegram bilan hamkorlikda ish yuritadi. Laboratoriyaning asosiy vazifasi – sun’iy intellekt texnologiyalarini ishlab chiqish va ulardan maxfiy, shifrlangan hamda samarali tarzda foydalanish imkoniyatlarini ta’minlashdan iborat.

Pavel Durovning so‘zlariga ko‘ra, mazkur tashabbus ikki yo‘nalishda muhim ahamiyat kasb etadi:

1. Telegram ekotizimida yangi AI yechimlarini joriy qilish va xizmat sifatini oshirish.

2. Qozog‘istonning ilmiy-tadqiqot salohiyatini kuchaytirish hamda mamlakatni mintaqadagi sun’iy intellekt markazlaridan biriga aylantirish.

Ekspertlar bu hamkorlikni Qozog‘iston uchun katta imkoniyat sifatida baholamoqda. Chunki mamlakat keyingi yillarda raqamli transformatsiya va texnologik mustaqillikka jiddiy e’tibor qaratmoqda.

Digital Bridge forumi esa o‘z navbatida mintaqadagi IT-muhitda xalqaro hamkorlik va yangi innovatsiyalarning turtkisi sifatida xizmat qilayotganini yana bir bor ko‘rsatdi.