O‘zbekistonda davlat boshqaruvini nomarkazlashtirish bo‘yicha yangi bosqich boshlanishi mumkin. Muhokamaga qo‘yilgan «Davlat boshqaruvini 2030-yilgacha nomarkazlashtirish strategiyasi» loyihasiga ko‘ra, kelgusi yillarda respublika darajasida amalga oshirilayotgan 250 ta funksiya va vakolat mahalliy davlat hokimiyati organlariga o‘tkaziladi.

Hujjatda qayd etilishicha, mazkur islohotning asosiy maqsadi qaror qabul qilish jarayonlarini aholiga yaqinlashtirish, hududlarning mustaqilligini oshirish va mahalliy muammolarni joyida hal qilish imkoniyatlarini kengaytirishdan iborat.

Bugungi kunda ko‘plab masalalar bo‘yicha qaror qabul qilish vakolati markaziy idoralarda saqlanib qolmoqda. Natijada ayrim hududlardagi muammolarni hal qilish uchun viloyat yoki respublika darajasidagi kelishuv va ruxsatlarni kutishga to‘g‘ri keladi. Yangi strategiya ana shu byurokratik jarayonlarni qisqartirishni ko‘zda tutadi.

Loyihaga muvofiq, vakolatlarni o‘tkazish bosqichma-bosqich amalga oshiriladi. Shuningdek, mahalliy hokimliklarning moliyaviy imkoniyatlarini kengaytirish, budjet mustaqilligini oshirish va davlat xizmatlarining bir qismini joylarda tashkil etish choralari ham nazarda tutilgan.

Strategiya loyihasi hozircha jamoatchilik muhokamasida bo‘lib, unga taklif va mulohazalar kiritilmoqda.