11 ноябрь куни Германия канцлери Фридрих Мерц 70 ёшга тўлди. У Конрад Аденауэрдан кейин юбилей санасини канцлер лавозимида қаршилаган иккинчи раҳбар бўлди. Умуман, Фридрих Мерц Европа Иттифоқи раҳбарлари орасида энг ёши улуғлардан бири ҳисобланади.

Бундестагнинг тантаналар залида ташкил этилган қабул маросимида юбилярнинг 300 га яқин ҳамкасби ва партиядошлари қатнашган.

DW нашри ёзишича, Ф.Мерц 70 ёши муносабат билан ҳукумат ва парламентдаги ҳамкасбларидан камтарона совғалар олган. 

Бундестагдаги ХДИ/ХСИ фракцияси раиси Йенс Шпан канцлерга фил, дельфин ва олмахон сурати туширилган галстуклар тўпламини ҳадя қилган. 

Социал-демократик партия вакили, вице-канцлер Ларс Клингбайль Фридрих Мерцни  «Германия учун жавобгарлик» битиги билан сийлаган. Клингбайль канцлерга атайин «ялтироқ латта-путта» совға қилмаганини таъкидларкан, Мерцнинг сиёсий коалицияси барқарор фаолият юритишини тилаган.

Парламент раиси Юлия Клёкнер ҳам ёндафтар, кружка каби камтарона совға билан чекланган.

70 ёшни қаршилаган давлат раҳбарига Бундестаг биносида ҳилпираб турган Германия байроғи (ўрнига янгиси осиладиган бўлди), гулдаста ва торт ҳам туҳфа қилинган.

Дарвоқе, ҳамкасблари канцлерга «Тушкунлик – вақтни ҳавога совуриш демак» ёзуви туширилган футболка ҳам топширган. 

Аввал хабар берганимиздек, Германияда жорий йил 23 февраль куни муддатидан олдин бўлиб ўтган сайловда ХДИ/ХСИ блоки 28,5 фоиз овоз билан ғалаба қозонди.

Ушбу ғалаба консерватив блок раҳбари Фридрих Мерцга канцлерликка йўл очди. Ҳукуматни шакллантириш учун ўнг марказчи ХДИ/ХСИ блоки сўл марказчи Германия социал-демократик партияси билан коалиция тузди.

Жорий йил 6 май куни Бундестаг иккинчи уринишда Мерцни канцлер лавозимига тасдиқлади. Такрорий овоз бериш чоғида Мерц учун 325 депутат овоз берди, минимал талаб 316 нафарни ташкил этарди.

Германия сиёсий етакчилари дабдаба ва ҳашаматдан холи ҳаёт кечириши маълум. Аввалроқ Германиянинг эндиликда собиқ канцлери Олаф Шольц 40 йилки битта портфелга қаноат қилиб келаётгани ҳам муҳокамаларга сабаб бўлганди.

Маълумот ўрнида: Германия ялпи ички маҳсулот ҳажми бўйича дунёда тўртинчи мамлакат саналади. Олмон давлатининг йиллик ЯИМ 4 триллион доллардан ошади.