Буюк Британия бош вазири Кир Стармер мамлакат Ҳўрмуз бўғозини блокада қилиш ташаббусида иштирок этмаслигини тасдиқлади. Бу ҳақда The Guardian нашри хабар берди.

Унинг таъкидлашича, ҳукумат позицияси аниқ – Лондон мазкур ҳарбий ёки чекловчи ҳаракатларга қўшилмайди.

Стармернинг сўзларига кўра, Ҳўрмуз бўғозидаги ҳар қандай чекловлар жаҳон энергетика бозорига салбий таъсир кўрсатади.

«Ҳар сафар бўғоз ёпилса ёки навигация учун чекланса, нефть ва газ бозорга чиқмайди ва нархлар ошади. Мен буни истамайман. Энергия нархлари барқарор бўлиши ва пасайиши керак», – деди у.

Бош вазир шунингдек, Британия минтақада минасизлантириш имкониятларига эга эканини таъкидлар экан, барча ҳаракатлар дипломатик ва сиёсий йўллар орқали бўғозни тўлиқ очишга қаратилган бўлиши лозимлигини айтди.

Аввалроқ АҚШ Марказий қўмондонлиги (CENTCOM) Ҳўрмуз бўғозида блокада жорий этилишини маълум қилган эди. Унга кўра, АҚШ кучлари Эрон портларига кириб-чиқаётган кемаларни чеклайди, аммо бошқа давлатлар кемалари учун транзитга тўсқинлик қилинмайди.

Мутахассислар фикрича, Британиянинг бу қарорини энергетика бозорида барқарорликни сақлашга қаратилган қадам сифатида баҳолаш мумкин.