Франция полицияси Лувр музейида содир этилган йирик ўғрилик иши бўйича икки нафар гумонланувчини қўлга олди. Бу ҳақда маҳаллий Le Parisien нашри хабар берди.

Маълумотларга кўра, биринчи гумонланувчи Руасси–Шарль-де-Голль аэропортида Жазоирга парвоз қилиш арафасида ушланган. Иккинчиси эса Парижнинг Сен-Сен-Дени туманида суд полицияси томонидан қўлга олинган. Амалиёт Франция Ички ишлар вазирлигининг босқинчиликка қарши кураш бўлинмаси иштирокида ўтказилган.

Мазкур шахслар «ташкилий ўғрилик» ва «жиноят содир этиш мақсадидаги жиноий тил бириктириш» моддалари бўйича айбланмоқда. Улар аввал ҳам турли кичик ўғриликлар билан боғлиқ жиноятлар учун полиция эътиборида бўлган. Терговчиларнинг фикрича, жиноятда жами тўрт нафар шахс иштирок этган бўлиши мумкин.

Эслатиб ўтамиз, Луврдаги ўғирлик 19 октябрь куни содир бўлган. Ўғрилар бир неча дақиқа ичида музейнинг Аполлон галереясига кириб, тарихий аҳамиятга эга тўққизта ноёб зеб-зийнатни ўғирлаб кетишган. Олтин ва бриллиантдан ясалган ушбу асарларнинг умумий қиймати тахминан 88 миллион евро деб баҳоланмоқда.