АҚШнинг Миннесота штатидаги Alpha News нашри ва CNN телеканали 9 январь куни Миннеаполисда содир бўлган отишма билан боғлиқ видеони эълон қилди. Ҳодиса оқибатида 37 ёшли Рене Николь Гуд ҳалок бўлганди.

Маълум қилинишича, видео АҚШ Иммиграция ва божхона хизмати (ICE) ходими Жонатан Росс томонидан мобил телефонга олинган. У айнан шу отишмани амалга оширган шахс ҳисобланади. Видеонинг давомийлиги бир дақиқадан кам бўлиб, унда отишмадан олдинги лаҳзалар акс этган. АҚШ Ички хавфсизлик вазирлиги вакили тасвир ҳақиқатан ҳам агентнинг телефонида ёзиб олинганини тасдиқлаган.

Видеода Росс кўчада йўлни тўсиб турган, автомобил олдида тургани кўринади. Автомобил бошқарувида Рене Гуд бўлган. Росс машинани айланиб ўтаётган пайтда, Гуд ойна орқали унга қараб: «Мен сенга ғазабланмаяпман», – дейди.

Росс автомобил рақамини суратга олаётган вақтда, марҳуманинг рафиқаси Бекка Гуд кадрга чиқади. У ходимдан юзини кўрсатишни сўраб, кейинчалик мулоқот қилиш мумкинлигини айтади.

«Сен биз билан боғланмоқчимисан? Баҳслашмоқчимисан? Мен эса сенга айтяпман: бор, тушлигингни қил, бола», – дея мурожаат қилади у.

Шу пайт бошқа бир офицер машина ёнига келиб, Рене Гудга: «Бу лаънати машинадан чиқ!» — деб бақиради. Шундан сўнг Гуд орқага чекинади, рулни ўнг томонга буриб, олдинга ҳаракатланади. Росс «О-о!» деб қичқиради ва орқасидан ўқ овозлари эшитилади.

Видеода автомобил Россга теккан-тегмагани аниқ кўринмайди, чунки камера кескин юқорига қараб кетади. Видеонинг охирида Гуднинг машинаси олдинга юриб, бошқа автомобилга урилиб кетгани кўринади.

АҚШ вице-президенти Жей Ди Вэнс ушбу видеога изоҳ бериб, ICE ходими хавф остида бўлганини айтди.

«Қараш оғир бўлса ҳам, бу видеони кўринг. Кўпчилигингизга бу ҳуқуқ-тартибот ходими машина билан уриб кетилмагани, таъқиб қилинмагани ва айбсиз аёлни ўлдиргани айтилди. Аслида эса унинг ҳаёти хавф остида эди ва у ўзини ҳимоя қилиш учун ўқ узган», – деди Вэнс видеони ижтимоий тармоқда қайта улашар экан.

Рене Гуднинг ўлимидан кейин Миннеаполис ва АҚШнинг бошқа шаҳарларида ICE ходимлари ҳаракатларига қарши оммавий намойишлар бўлиб ўтди. Мутахассислар эса ушбу воқеа синчиклаб тергов қилиниши лозимлигини таъкидламоқда. Уларнинг фикрича, агент ўзи учун хавфли вазиятни юзага келтирган ва кейин шундай ҳолатда қурол ишлатишга мажбур бўлган.