АҚШ президенти Дональд Трамп маъмурияти Венесуэланинг вақтинча президенти Делси Родригесдан қатор қатъий талабларни бажаришни сўрамоқда. Акс ҳолда у собиқ президент Николас Мадуро тақдирига дуч келиши мумкин.

Politico нашри манбаларига кўра, Оқ уй Родригес олдига камида учта асосий – наркотрафикка қарши кескин чоралар кўриш, Эрон, Куба ва бошқа АҚШга «душман» деб баҳоланган давлатлар агентларини мамлакатдан чиқариб юбориш ҳамда Венесуэла нефтини АҚШ рақибларига сотишни тўхтатиш талабларни қўйган.

Бундан ташқари, АҚШ расмийлари Родригесдан эркин сайловлар ўтказишга ёрдам бериш ва кейинчалик президентликдан кетишни ҳам кутмоқда. Politico’нинг таъкидлашича, бу талаблар учун аниқ муддатлар ҳозирча белгиланмаган.

Шунингдек, АҚШ Венесуэлада қамоқда сақланаётган америкалик фуқароларни озод қилиш масаласини ҳам кўтармоқчи. Бироқ барча венесуэлалик сиёсий маҳбусларни озод этиш бўйича талаб қўйилгани ҳақида маълумот йўқ.

Трамп 5 январь куни NBC’га берган интервьюсида яқин 30 кун ичида Венесуэлада янги президентлик сайловлари бўлмаслигини айтганди. Унинг сўзларига кўра, АҚШ аввало «мамлакатда тартиб ўрнатиши» керак. Трамп, шу билан бирга, Родригес ҳамкорликни тўхтатса, АҚШ яна куч ишлатиши мумкинлигини истисно қилмаган.

Маълумот учун, Делси Родригес Мадуро ҳукуматида вице-президент бўлган. Мадуро қўлга олинганидан сўнг, у вақтинча давлат раҳбари этиб тайинланган. Илк пайтда у Мадуронинг қўлга олинишини қоралаган, кейин эса Трампни тинчлик ва мулоқотга чақирган.