Венесуэланинг вақтинчалик президенти Делси Родригес АҚШ қуролли кучлари томонидан ўтказилган ҳарбий операцияда ҳалок бўлган хавфсизлик хизматлари ходимлари хотирасига 7 кунлик миллий мотам эълон қилди.

Расмий маълумотларга кўра, Америка қўшинларининг рейди натижасида камида 24 нафар венесуэлалик куч тузилмалари ходими, шунингдек, 30 дан ортиқ кубалик ҳарбий хизматчи ҳалок бўлган. Кубада ушбу воқеа муносабати билан 5–6 январь кунлари мотам эълон қилинган.

Делси Родригес халққа мурожаатида мамлакат тинч йўлдан оғишмаслигини таъкидлади.

«Бу ерда уруш йўқ, чунки биз уруш ҳолатида эмасмиз. Биз ҳужумга учраган тинч мамлакатмиз. Биз тинчлик йўлидан боришда давом этамиз. Бутун венесуэла халқи миллий бирдамликни қўллаб-қувватлаб, келажагимиз учун меҳнат қилиб, тарихимиз ва қадр-қимматимизни ҳимоя қилишимиз керак», – деди у.

Эслатиб ўтамиз, жорий йил 3 январ куни АҚШ ҳарбийларининг махсус операцияси давомида Венесуэла президенти Николас Мадуро ва унинг рафиқаси ушлаб кетилган эди. Қўшма Штатлар Мадурони наркосавдо билан боғлиқ жиноятларда айблаяпти.