АҚШ президенти Дональд Трамп Венесуэлада яқин 30 кун ичида сайловлар ўтказилиши мумкин эмаслигини билдирди. Унинг таъкидлашича, аввал мамлакатда вазиятни барқарорлаштириш зарур.

«Аввало, биз мамлакатда тартиб ўрнатишимиз керак. Сайловлар ўтказиб бўлмайди. Бунинг учун вақт керак», – деди Трамп NBC телеканалига берган интервьюсида.

Трампнинг сўзларига кўра, Венесуэланинг вақтинчалик президенти Делси Родригес Оқ уй билан ҳамкорлик қилмоқда. Бироқ у ҳамкорлик тўхтатилса, АҚШ яна куч ишлатиши мумкинлигини истисно этмади.

«Биз бунга тайёрмиз. Аслида, бундай сценарийни биз аввалдан ҳам кўзда тутган эдик — Николас Мадуро ўғирлаб кетилганидан сўнг Венесуэлага қўшин киритишни режалаштирганмиз», – деди Трамп.

Шу билан бирга, АҚШ президенти Венесуэла мухолифати етакчиси Мария Корина Мачадони қўллаб-қувватлашдан бош тортгани ҳақидаги хабарларни рад этди. Айрим маълумотларга кўра, бунга у Нобел тинчлик мукофотини Трамп фойдасига бермагани сабаб бўлгани айтилган эди. 

«У ғалаба қозониши керак эмас эди. Лекин бу асло менинг қароримга таъсир қилмаган», – деди Трамп.

Экспертлар фикрича, мазкур баёнотлар АҚШнинг Венесуэлага нисбатан сиёсатида ҳарбий ва сиёсий босим усуллари сақланиб қолаётганини кўрсатади.