Россия Ташқи ишлар вазири Сергей Лавров РИА Новостига берган интервьюсида Украина кризиси, музлатилган активлар, АҚШ ва Европа билан муносабатларга ойдинлик киритди.

Лавровнинг таъкидлашича, Москва Аляскада Россия ва АҚШ ўртасида Украина масаласи бўйича эришилган келишувлар кучда қолишини Вашингтондан тасдиқлашни кутмоқда. Унга кўра, келишув адолатли ва барқарор ечим тамойилларига асосланган, аммо Ғарбдаги айрим давлатлар АҚШни сиёсий-дипломатик йўлдан оғдиришга уринаётгани муаммо туғдирмоқда.

Вазир Россиянинг музлатилган активларини Киев манфаатларига йўналтириш уринишларини “талончилик” деб атади ва бундай ҳаракатларга адекват жавоб қайтарилишини билдирди.

Қрим масаласи Россия учун ёпиқ эканини таъкидлаган Лавров, яриморол аҳолиси 2014 йилда референдум орқали Россия таркибини танлаганини эслатди.

АҚШ билан икки томонлама муносабатлар борасида Лавров янги маъмурият билан мулоқот бораетганини, бироқ жараён секин кечаётганини айтди. Дипломатик мулкни қайтариш ва тўғридан-тўғри авиақатновларни тиклаш бўйича таклифлар Вашингтонга етказилган.

У Давлат котиби Марко Рубио билан Украина ва икки томонлама масалалар юзасидан мунтазам мулоқот зарурлигини қайд этди.