Ахиос нашри манбаси Абу-Дабида Россия вакиллари Украина Мудофаа вазирлиги Бош разведка бошқармаси бошлиғи Кирилл Буданов бошчилигидаги Украина делегацияси билан тўғридан-тўғри музокаралар олиб бораётганини маълум қилди.

Бугун, 25 ноябр куни у ерда Россия ва АҚШ делегацияси ўртасида тинчлик режасини муҳокама қилиш учун учрашув ҳам бўлиб ўтмоқда. 

Axios манбаси "Украина ва Россия ҳарбий разведкаси раҳбарлари Абу-Дабида бошқа мавзу бўйича учрашишлари керак эди" деб хабар берди. Манбага кўра, АҚШ армияси котиби Ден Дрисколлнинг Абу-Дабига ташрифи "иккала томон учун ҳам кутилмаган воқеа бўлди ва уларнинг режаларини ўзгартирди". 

Ден Дрисколлнинг матбуот котиби Жефф Толберт Абу-Дабидаги Россия делегацияси билан АҚШ музокаралари "яхши кетаётганини" ва Вашингтон "оптимистик кайфиятда" эканлигини хабар қилди. Axios манбасининг аниқлик киритишича, АҚШ делегацияси Украина томони билан ҳам музокаралар олиб бормоқда.

Россия президенти матбуот котиби Дмитрий Песков Кремл Абу-Дабидан янгиликларни кузатиб бораётганини айтди, аммо бошқа изоҳ бермади.

Аввалроқ Украина АҚШ тинчлик режасига розилик билдиргани хабар берилганди.