Трамп Эронга қарши ядровий қурол ишлатиш вариантини рад этди. 

АҚШ президенти Доналд Трамп Эронга қарши ядровий қурол ишлатиш режаси йўқлигини айтди. 

«Нега мен ядровий қурол ишлатишим керак? Биз уларни анъанавий равишда, ядровий қуролларсиз бутунлай йўқ қилдик», деди президент Оқ уйда журналистлар билан учрашувда (Reuters иқтибос келтирган). «Мен улардан фойдаланмайман. Ядровий қурол ҳеч қачон ҳеч ким томонидан ишлатилмаслиги керак». 

АҚШ президентининг сўзларига кўра, Эрон икки ҳафталик сулҳ давомида қурол захираларини оз миқдорда тўлдирган. Бироқ, Трамп Америка ҳарбийлари «уларни тахминан 24 соат ичида йўқ қила олишини» таъкидламоқда. Журналистлар билан учрашув давомида у Эрон денгиз флоти, ҳаво кучлари ва ҳаво мудофааси тизимлари «бутунлай йўқ қилингани» ҳақидаги аввалги баёнотларини ҳам такрорлади. 

Эрон билан қачон келишувга эришиш мумкинлиги ҳақидаги саволга жавобан Трамп шошилмасликни сўради.

«Мен иложи борича энг яхши келишувга эришмоқчиман. Ҳозир ҳам келишувга эришишим мумкин... лекин мен буни қилишни хоҳламайман. Мен келишув ва тинчлик абадий бўлишини истайман», деган у.