Европа Иттифоқи Россияга қарши 20-санкциялар пакетини тасдиқлади. Бу ҳақда Еврокенгаш раҳбари Антониу Кошта Х ижтимоий тармоғида маълум қилди.

20-пакетга 117 нафар жисмоний шахс ва 60 та юридик шахс кирди, деб хабар берди ТАСС Эстония ТИВга асосланиб. Шу билан бирга, илгари кўзда тутилган барча чекловлар қабул қилинмади. ЕИ Россия нефтининг денгиз орқали ташилишини тўлиқ тўхтатиш ниятида эди, бироқ бу банд келишилмади. «Қора рўйхат»га 46 та танкер кирди — эндиликда санкция остидаги кемаларнинг умумий сони 600 тадан ошади. Яна бир чеклов — танкерларни Россия Федерацияси шахсларига сотишни тўлиқ тақиқлашдир.

Бундан ташқари, санкцияларга Россиянинг 20 та банки қўшилди, заводлар рўйхати кенгайди. Илгари россияликларга чекловларни четлаб ўтишда ёрдам берган Лаос, Озарбайжон, Арманистон ва Қирғизистон молия муассасалари билан операцияларни амалга оширишга тақиқ қўйилди. Шунингдек, Европа Иттифоқи санкция остидаги товарларни учинчи давлатларга экспорт қилишни тақиқлаш механизмини ишлаб чиқди.

ЕИ баёнотидан келиб чиқадики, криптоактивларни ўтказиш ва алмаштириш учун Россияда яратилган етказиб берувчилар ва платформаларга тўлиқ секториал тақиқ жорий этилмоқда. RUBx криптовалютаси билан боғлиқ операциялар, шунингдек, рақамли рублни ишлаб чиқишда ЕИ томонидан ҳар қандай кўмак берилиши тақиқланади.

Бошқа чекловлар:

• Россияга киберхавфсизлик соҳасида хизматлар кўрсатишни тақиқлаш;
• Россия Федерацияси нефт секторининг 36 та компаниясига қарши санкциялар;
• Мурманск ва Туапседаги иккита Россия порти, шунингдек, Индонезиядаги Каримун порти нефт терминали билан операцияларни амалга оширишни тақиқлаш;
• Олмосларнинг Россия Федерациясида қазиб олинмагани, қайта ишланмагани ёки ишлаб чиқарилмаганини тасдиқлаш учун уларнинг келиб чиқишини кузатувчанлик талабларини кучайтириш;
• A7A5 стейблкоини савдо қилинадиган биржани бошқарувчи Қирғизистон ташкилоти санкциялар рўйхатига киритилди;
• 2027 йилдан бошлаб Россия компанияларига СТГ-терминаллари (суюлтирилган табиий газ) хизматларини кўрсатишга тақиқ қўйилди;
• ЕИ санкциялари жорий этилган шахслар орасида Эрмитаж директори Михаил Пиотровский, рэпер ва тадбиркор Тимати, РХБҲ (Радиацион, кимёвий ва биологик ҳимоя) қўшинлари бошлиғи Алексей Ртишчев ва бошқалар бор.

Украина учун рекорд даражадаги кредит

Санкциялар билан бир вақтда, ЕИ вакиллари Украина учун 90 миллиард евро миқдоридаги кредитни маъқулладилар. Коштанинг таъкидлашича, Евроиттифоқнинг тинчлик ўрнатиш стратегияси «Украинани мустаҳкамлаш ва Россияга босимни кучайтириш»га таянади, қабул қилинган қарор эса — ҳар икки йўналишда олдинга ташланган қадамдир.

Венгрия ва Словакия аввалроқ Украинани молиялаштириш режасига вето қўйган эди, бироқ 22 апрел куни уни бекор қилди. Шу билан бирга, ушбу мамлакатлар мазкур дастурда иштирок этишдан бош тортди. Кредитга хизмат кўрсатиш ва уни тўлаш мажбурияти Европа Иттифоқи зиммасига тушади — Киевга пуллар қайтармаслик шарти билан берилади.

Хабарларга кўра, Евроиттифоқ 20-пакет доирасида Ўзбекистоннинг айрим компанияларига ҳам санкциялар жорий қилган.