Филиппиндаги зилзилада салкам 70 киши ҳалок бўлди
Филиппиндаги зилзила қурбонлари сони 69 нафарга етди. Бу ҳақда ҳукумат брифинги маълумотларига асосланиб Reuters хабар берди.
Кеча, 30 сентябр куни маҳаллий вақт билан соат 22:00 лар атрофида (Ўзбекистон вақти билан 19:00) Себу музофоти соҳиллари яқинида 6,9 магнитудали зилзила юз берди. Унинг ўчоғи 10 км чуқурликда жойлашган. Зилзиладан сўнг бир нечта афтершок қайд этилди, улардан энг кучлиси 6 баллни ташкил этди.
Табиий офат қурбонларининг барчаси — себуликлар. Бундан ташқари, 150 киши жароҳатланган. Ер силкинишидан Сан-Ремижио муниципалитети талафот кўрди.
Аҳолиси 3,5 млн кишига яқин Себу Филиппиндаги энг оммалашган сайёҳлик йўналишларидан саналади.
Филиппин Тинч океанининг фаол вулқонларга бой ва зилзилалар кўп кузатилувчи «оловли ҳалқаси»да жойлашган. 2023 йилда мамлакатда 6,7 магнитудали зилзила оқибатида саккиз киши ҳалок бўлганди.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter