Украина президенти Владимир Зеленский америкалик музокарачилар – Стив Уиткофф ва Жаред Кушнерни Украинага нисбатан ҳурматсизликда айблади.

Унинг айтишича, АҚШ вакилларининг Москвага бориб, Киевга келмаслиги нотўғри сигнал ҳисобланади.

«Москвага бориб, Киевга келмаслик – бу ҳурматсизлик», – деди Зеленский давлат телевидениесига берган интервьюсида.

Шу билан бирга, у музокараларнинг қаерда ўтказилиши эмас, балки уларнинг натижаси муҳим эканини таъкидлади. Президентга кўра, музокарачилар учун Украинага ташриф буюриш зарур, чунки бу уларнинг ўзи учун ҳам муҳим аҳамиятга эга.

Зеленский Россия томонидан илгари сурилган талаб – Украина қўшинларини Донбассдан олиб чиқишни яна бир бор рад этди.

Унинг фикрича, бундай қарор мамлакат учун стратегик мағлубиятга олиб келиши мумкин. Қўшинларнинг чиқиб кетиши мудофаа чизиғининг заифлашишига ва армия руҳиятининг пасайишига сабаб бўлади.

Президент, шунингдек хавфсизлик кафолатлари масаласига ҳам эътибор қаратди. Унинг таъкидлашича, агар фронт чизиғида халқаро иштирок бўлмаса, Россия маълум вақт ўтгач яна ҳужум бошлаши мумкин.

Зеленскийнинг фикрича, урушни тезроқ тугатишнинг энг мақбул йўли – амалдаги фронт чизиғини «музлатиш»дир. Бироқ бу ҳам тегишли хавфсизлик кафолатларисиз амалга оширилиши мумкин эмас.

Маълумотларга кўра, АҚШ бир неча ойдан буён томонларга босим ўтказиб, тинчлик музокараларини қайта жонлантиришга уринмоқда. Бироқ сўнгги пайтлардаги геосиёсий вазият сабабли музокаралар жараёни секинлашган.

Шу вақтгача америкалик музокарачилар бир неча бор Москвага ташриф буюрган, аммо Киевга келиши ҳали амалга ошмаган.