Boysundagi o‘rmon yong‘ini bir sutkada o‘chirildi
Surxondaryo viloyati Boysun tumanidagi «Xomkon» o‘rmon bo‘limi hududida yuz bergan yong‘in bir sutkada o‘chirildi. Bu haqda viloyat Favqulodda vaziyatlar boshqarmasi ma’lum qildi.
12 avgust kuni soat 17:15 da «112» tizimiga «Chilonzor» MFY hududidagi o‘rmon bo‘limida quruq o‘t va shox-shabbalar yonayotgani haqida xabar kelib tushgan.
Yong‘inni o‘chirish ishlariga Favqulodda vaziyatlar boshqarmasidan 194 nafar xodim va 8 ta texnika, «Boysun davlat o‘rmon xo‘jaligi»dan 60 nafar xodim va 3 ta texnika, shuningdek, 55 nafar mahalliy ko‘ngilli fuqaro jalb etilgan.
13 avgust soat 17:30 holatiga ko‘ra, yong‘in to‘liq bartaraf etilgan. Dastlabki ma’lumotlarga ko‘ra, taxminan 1 gektar maydondagi quruq o‘t va shox-shabbalar yongan.
Hodisa oqibatida fuqarolar jarohatlangani haqida ma’lumot kelib tushmagan.
Hozirda yong‘inning kelib chiqish sabablari aniqlanmoqda.
Izoh qoldirish uchun saytda ro'yxatdan o'ting
Kirish
Ijtimoiy tarmoqlar orqali kiring
FacebookTwitter