O‘zgidromet ma’lumotiga ko‘ra, dam olish kunlari O‘zbekistonning ayrim hududlarida qisqa muddatli yomg‘ir yog‘ishi va momaqaldiroq kuzatilishi kutilmoqda. Ob-havo sharoitida o‘zgarishlar kuzatilishi prognoz qilingan.

Juma kuni respublika bo‘yicha quruq va iliq ob-havo saqlanib qoladi. Kunduzgi havo harorati +25…+30 daraja atrofida bo‘lishi kutilmoqda.

Shanba va yakshanba kunlari esa ayrim joylarda yog‘ingarchilik kuzatilib, harorat foni biroz pasayadi. Kunduzgi harorat asosan +20…+25 darajaga tushishi prognoz qilingan.

Shanba kuni shimoli-g‘arbiy hududlar va cho‘l zonalarida, yakshanba kuni esa respublika bo‘yicha keng hududlarda yog‘ingarchilik ehtimoli yuqori. Ayrim joylarda momaqaldiroq ham kuzatilishi mumkin.

Tog‘oldi va tog‘li hududlarda sel-suv toshqin hodisalari yuzaga kelishi xavfi bor.

Shamol tezligi 7–12 m/s ni tashkil etib, ba’zi joylarda 13–18 m/s gacha kuchayishi mumkin. Ayrim hududlarda chang-to‘zonlar kuzatilishi ehtimol qilinmoqda.

Toshkent shahrida juma va shanba kunlari yog‘ingarchilik kutilmaydi. Harorat kunduzi +27…+29 daraja atrofida bo‘ladi.

Yakshanba kuni esa qisqa muddatli yomg‘ir yog‘ishi, shamol 10–12 m/s gacha kuchayishi va momaqaldiroq kuzatilishi mumkin. Kunduzgi harorat +21…+23 darajaga tushadi. Kechalari esa harorat asosan +12…+17 daraja, poytaxtda esa +13…+15 daraja atrofida bo‘lishi prognoz qilinmoqda.