O‘RQ–1164-sonli qonun bilan litsenziya yoki ruxsat berish xususiyatiga ega hujjat olishda «Biznesga litsenziyasiz kirish» maxsus rejimi joriy etilmoqda. Unga ko‘ra, talabgor muayyan faoliyatni boshlashdan oldin vakolatli organga maxsus elektron tizim yoki YIDXP orqali bepul xabar berishi mumkin.

Shundan so‘ng faoliyatni litsenziya yoki ruxsat etish xususiyatiga ega hujjat olmasdan amalga oshirishga ruxsat beriladi. Maxsus rejimning amal qilish muddati 3 oy etib belgilangan.

Ushbu muddat davomida talabgor muayyan faoliyatni litsenziyasiz yoki tegishli ruxsat hujjatisiz amalga oshirgani uchun javobgarlikka tortilmaydi.

Maxsus rejimdan foydalangan talabgor 3 oy davomida o‘z faoliyatini litsenziya yoki ruxsat berish talablari va shartlariga muvofiqlashtirishi kerak. Shuningdek, u belgilangan tartibda tegishli litsenziya yoki ruxsat etish xususiyatiga ega hujjatni olishi lozim.

Agar talabgor belgilangan muddatda zarur hujjatni olmasa, u mazkur faoliyatni to‘xtatishi kerak. Demak, maxsus rejim doimiy ravishda litsenziyasiz ishlash huquqini emas, faoliyatni qonuniy talablarga moslashtirish uchun vaqtinchalik imkoniyatni nazarda tutadi.

Qonun bilan maxfiy hujjatlarni saqlash muddati ham 30 yil etib belgilandi. Shuningdek, shaxsiy tarkibga oid hujjatlarni saqlash bo‘yicha alohida muddatlar joriy qilindi.

2019-yil 1-yanvargacha ish yurituvi yakunlangan shaxsiy tarkib hujjatlari idoraviy arxivlarda 75 yil saqlanadi. 2019-yil 1-yanvardan keyin shakllantirilgan hujjatlar esa 50 yil davomida saqlanadi.

E’tiborli jihati shundaki, tadbirkorga faoliyatni boshlash uchun uch oylik yengillashtirilgan davr beriladi, biroq bu vaqt ichida u litsenziyalash yoki ruxsat berish talablarini bajarishi shart.