Кеча, чоршанба куни Дональд Трамп маъмурияти олиб бораётган иммиграцияга қарши рейдлар доирасида Миннеаполис шаҳрида Иммиграция ва божхона назорати хизмати (ICE) ходими бир аёлни отиб ўлдирди.

Интернетда тарқалган видеоларда 37 ёшли аёл офицерлар унинг автомобилига яқинлашиб, эшикни очиб тушишни буюрган пайтда йўлни тўсиб тургани кўринади. Аёл олдинга юрганида, машинанинг олдида турган бошқа бир ICE ходими қуролини чиқариб, яқин масофадан йўл танламас автомобиль томон ўқ узади ва аёл жароҳатланиб вафот этади.

Трамп ҳодисага муносабат билдириб, ICE ходими «ўзини ҳимоя қилиш доирасида ҳаракат қилганини» айтди ва ҳалок бўлган аёлни «провакация қилган»ликда айблади. Аммо бу фикрни Миннеаполис мэри Жейкоб Фрей рад этди ва ICE ходимларидан шаҳарни тарк этишни талаб қилди. 

«Улар буни аллақачон ўзини ҳимоя қилиш сифатида кўрсатишга уринишяпти. Видеони кўргандан сўнг очиқ айтаман – бу мутлақо сафсата. Улар Американи хавфсиз қилиш учун эмас, балки беқарорлик ва ишончсизлик яратиш учун ҳаракат қилмоқда. Улар оилаларни парчалаб юбормоқда», – деди Фрей матбуот анжуманида.

CNN телеканалига берган алоҳида интервьюсида Фрей аёл ҳеч кимни уриб кетишни мақсад қилмагани, балки қочишга урингани унга аниқ бўлганини айтди. Унинг таъкидлашича, бу ҳолат ўлимли куч ишлатишга асос бўла олмайди.

CNN бош таҳлилчиси Жон Миллер эса ҳалок бўлган аёлнинг автомобили ғилдираклари офицерлардан четга бурилган ҳолатда бўлганини таъкидлаб, бу расмийларнинг версиясига зид эканини айтди.

NYT'нинг ёзишича, ушбу ҳодисадан кейин Миннеаполисда мингдан ортиқ одам иштирокида норозилик намойишлари бошланган. Бундан ташқари, Нью-Йоркда тахминан 400 киши ICE офиси олдида норозилик билдирмоқда.

Миннеаполис шаҳар кенгаши маълумотига кўра, ICE ходими отиб ўлдирган аёл 37 ёшли Рене Николь Гудбай бўлиб, у олти ёшли боланинг онаси бўлган.

«У эрталаб қўшниларига ғамхўрлик қилаётган эди, аммо бугун унинг ҳаёти федерал ҳукумат қўли билан тортиб олинди», – дея муносабат билдиради шаҳар кенгаши.