АҚШ президенти Доналд Трампнинг матбуот котиби Кэролайн Левитт август ойи охирига қадар лавозимини тарк этади. Оқ уйнинг энг ёш матбуот котиби сифатида тарихга кирган 28 яшар Кэролайн Левитт икки йиллик фаолияти мобайнида бир қатор можароли баёнотлари билан тилга тушди.

Аввал хабар берганимиздек, Доналд Трамп Левиттнинг кутилмаган истеъфосини оиласи ва икки фарзанди билан кўпроқ вақт ўтказишни режалаштираётгани билан изоҳлади.

Оммавий ахборот воситалари эса ушбу истеъфо Трамп Анқарадан қайтиш чоғи бир гуруҳ аъёнлари қаторида Кэролайн Левиттни ҳам эҳтимолий таҳдид нишони бўлган учоқда қолдиргани ортидан рўй бераётганига эътибор қаратган. 

The Washington Post нашри ёзишича, Трамп жорий йил 8 июл куни Туркиядаги НАТО саммитидан сўнг мамлакатни тарк этаётганида самолётини махфий равишда алмаштиришга мажбур бўлган. Ушбу қарор АҚШ махсус хизмати томонидан Эрон билан боғлиқ суиқасд хавфи сабабли қабул қилинган.

Биргина Трампнинг хавфсизлиги важидан самолётда таҳдиддан бехабар одамларнинг қолдирилиши жамоатчилик томонидан танқидий баҳоланди.

Кэролайн Левитт зиддиятли мулозим саналади. Трампнинг тарафдорлари уни АҚШ президентининг ашаддий ҳимоячиси дея ҳурмат қилади. Бошқалар эса уни Трампнинг мухолифларини, ҳатто бироз танқидий фикр билдирганларни ҳам ҳақорат қилишдан тоймайдиган шахс ўлароқ қоралайди.  

Euronews телеканали Оқ уй воизи иштирокидаги “ишкал”ларни бир жойга жамлади. Улардан айримларини эслаб ўтамиз.

2025 йил март ойида ўтказилган матбуот анжуманида Associated Press агентлиги мухбири Жош Боак Левиттнинг президент Трампнинг бож сиёсатига доир баёноти юзасидан эътироз билдиради.

«У солиқларни оширмаяпти. Божлар бизни йиллар мобайнида шилиб келган хорижий давлатларга нисбатан солиқлар ошишини англатади. Божлар америкаликлар учун солиқлар камайиши демакдир», — дея Трампнинг бож сиёсатини оқлаган унинг матбуот котиби.

«Кечирасиз, ўзингиз бирор марта бож тўлаганмисиз? Масалан, мен тўлаганман. Божлар хорижий ширкатлардан эмас, балки (АҚШнинг) импорт билан шуғулланувчиларидан ундирилади», — дея эътироз билдирган Associated Press мухбири.

Левитт эътирозга тайинли жавоб бермаган, аммо Associated Press мухбирини ҳақорат қилишда айблаган. 

Associated Press агентлиги Мексика қўлтиғини Трамп маъмурияти талаб қилганидек, “АҚШ қўлтиғи” деб атамагани сабабли Оқ уй тадбирларида қатнашиш имконидан маҳрум этилган. Кейинроқ нафақат АҚШ, балки бутун дунёдаги нуфузли агентликка нисбатан жазо чораси бекор қилинган. Аммо ушбу ҳодиса Левитт ОАВ вакилларини назоратга олишга уринганидан далолат беради.

Пировардида, матбуот котиби Оқ уй тадбирларига Трампга мойил, уни мақташга иштиёқманд бўлган блогер ва журналистларни ҳам таклиф этган.  

Таҳлилчиларга кўра, Левиттнинг Трамп сиёсатига нисбатан танқидий мулоҳаза билдирган журналистлар билан даҳанаки тортишувга берилиши деярли одатга айланган.

2025 йилнинг октябрида у HuffPost нашри мухбири билан жанжалга сабаб бўлган. Ўша кезлар президент Трамп Венгрия пойтахти Будапештда Россия президенти Владимир Путин билан учрашишни режалаштирган эди.  

«Президент (Трамп) Будапештнинг аҳамиятини англайдими? 1994 йили Будапештда Россия Совет Иттифоқи парчаланишидан сўнг ўзига ўтган ядро қуролидан воз кечса, Украинага бостириб кирмасликка ваъда берган эди. Наҳотки у Украина музокара учун бу шаҳар танланишига қарши бўлиши мумкинлигини тушунмаса? (Музокара учун) Будапештни ким таклиф қилди? Жавобингиз учун раҳмат!» — дея вазминлик билан савол йўллаган HuffPost мухбири.

Оқ уй матбуот котиби эса бу мурожаатга “Онанг (таклиф қилди)” дея қўпол тарзда жавоб қайтарган. Боз устига, у HuffPost нашри мухбирига “ўта сўл пропагандачи” дея айб тақаган.

Левитт АҚШда сиёсий зилзила келтириб чиқарган “Эпштейн иши”ни демократлар уюштирган сохта иш дея даъво қилиб келган. 2026 йил феврал ойида журналистлар АҚШ савдо вазири  Ҳовард Латникнинг Жеффри Эпштейн билан алоқаси ҳақида савол берганида, Левитт аввалига савдо вазирини обдон ҳимоя қилган, сўнгра матбуот анжумани ҳали якунланмай, журналистлар даврасини намойишкорона тарк этган.

Ўтган йил март ойида Кэролайн Левитт француз депутатининг “Озодлик” ҳайкалини ортга қайтариш хусусидаги талабига жавоб қайтараркан, Европа парламенти депутатини “қуйи даражадаги исмсиз француз сиёсатчиси” дея ерга урган.

Август ойида эса у Трампнинг “жаннатга тушиш” борасида истаги ҳазил эмаслигини очиқлаган.

Жорий йил 28 феврал куни Эроннинг Миноб туманидаги “Шажарайи Тоййиба” мактаби бомбаланиши оқибатида 170 га яқин ўқувчи қиз ҳалок бўлган эди.

БМТнинг Инсон ҳуқуқлари бўйича олий комиссари Фолкер Тюрк ушбу ҳолатни тезкорлик билан, холис ва ҳаққоний тарзда тафтиш этишни талаб қилган.

Ўрганишлар мактабга зарбани АҚШ ҳарбийлари амалга оширганини кўрсатган.

Левитт фожианинг кўлами ва аҳамиятини пасайтиришга уринган, бу борада АҚШ ҳарбийларининг айби йўқлигини даъво қилган эди. Эрон Оқ уй матбуот котибининг ўнлаб бегуноҳ ўқувчилар ҳалок бўлиши борасидаги позициясига кескин жавоб қайтарган.

Кэролайн Левитт жорий йил май ойида қиз фарзанд кўргани маълум. У 60 ёшли қурилиш магнати Николас Риччиога турмушга чиққан.

«Миноб мактабидаги раҳбарингиз ўлдирган ва сиз оқлаган 168 нафар ўқувчи ҳам бола эди. Фарзандингизни эркалаб ўпаётган пайтингизда (ҳалок бўлган) болаларнинг оналарини ҳам ёдга олинг», — дея ижтимоий тармоқда пост чоп этган Эроннинг Арманистондаги элчихонаси.