Парламент Қуйи палатасида депутатлар коррупцияга қарши курашиш чораларини кучайтиришга қаратилган қонун лойиҳасини иккинчи ўқишда қабул қилди.

Хусусан, Жиноят кодекси ўзлаштириш ёки растрата йўли билан талон-торож қилганлик, фирибгарлик учун ҳукм қилинган ва жиноят туфайли етказилган зарарнинг ўрнини тўлиқ қопламаган шахс жазодан муддатидан илгари шартли равишда озод қилинмаслигини назарда тутувчи норма билан тўлдирилмоқда.

Худди шундай қоида такроран ёки хавфли рецидивист томонидан ёхуд жуда кўп миқдорда пора олиш, пора бериш, пора олиш-беришда воситачилик қилганлик учун ҳукм қилинган шахсларга нисбатан ҳам татбиқ этилиши белгиланяпти.

Ўзлаштириш ёки растрата йўли билан талон-торож қилиш ва фирибгарлик ҳаракатларини мансаб мавқеини суиистеъмол қилиш йўли билан ёки хизмат мавқеидан фойдаланиб содир этиш жинояти учун ҳам жавобгарлик чоралари оғирлаштирилмоқда.

Мажлисда қонун лойиҳаси депутатлар томонидан қабул қилинди ва Сенатга юборилди.