АҚШ байроғи рангларида бўялган Гренландия харитаси АҚШ президенти Дональд Трамп маслаҳатчисининг рафиқаси Кэти Миллер томонидан ижтимоий тармоқда эълон қилинди. У постга қисқача «Тез орада» деб изоҳ қолдирган.

Табиийки, бу пост АҚШнинг навбатдаги эҳтимолий босқинига ишора сифатида талқин қилинди. Дания расмийлари эса бундай билдиришни кескин танқид қилиб, Қиролликнинг ҳудудий яхлитлигига ҳурмат билан муносабатда бўлишни талаб қилди.

Шу орада АҚШнинг Венесуэлага берган ҳарбий зарбаси оқибатлари ҳақида янги маълумотлар пайдо бўлди. The New York Times нашрининг маълум қилишича, ҳужум натижасида камида 40 нафар ҳарбий ва тинч аҳоли вакиллари ҳалок бўлган.

Мавжуд маълумотларга кўра, АҚШ давлат котиби Марко Рубио Венесуэла бўйича АҚШ томонидан бошқарувда етакчи роль ўйнаши мумкин. Бу ҳақда Bloomberg хабар бермоқда. Бироқ ҳозирча мамлакатни тартибга солиш бўйича аниқ режа ишлаб чиқилмаган.

Reuters агентлигига кўра, Венесуэладан нефть етказиб бериш деярли тўхтаб қолган. Сабаб сифатида портларда турган танкерларга жўнаш учун рухсат берилмаётгани, айрим кемалар эса порт ҳудудини бўш ҳолда тарк этаётгани қайд этилмоқда.

Шу билан бирга, Politico газетаси АҚШ ҳукумати нефть компанияларига қатъий ультиматум қўйганини ёзмоқда. Агар улар мусодара қилинган активлар учун компенсация олишни истаса, Венесуэланинг нефть қазиб чиқариш соҳасига катта миқдорда сармоя киритиши шарт.

Бундан ташқари, Илон Маскка тегишли Starlink компанияси Венесуэлада бир ой давомида бепул интернет билан таъминлашни ваъда қилди.

Халқаро кузатувчиларга кўра, мазкур воқеалар Лотин Америкасида геосиёсий кескинлик янада кучайиб бораётганидан далолат бермоқда.